Përmes një postimi në Twitter, Kurti tha se i dhanë lamtumirën e fundit një personi që ka bërë shumë për popullin e Kosovës dhe lirinë e vendit.
“Së bashku me presidenten Vjosa Osmani, mora pjesë në funeralin e Madeleine Albright në Katedralen Kombëtare në Uashington DC. I dhamë lamtumirën e fundit një personi që ka bërë shumë për popullin tonë, për lirinë tonë dhe për paqen”, ka shkruar Kurti.
Zyra e Kryeministrit ka njoftuar se liderët shtetërorë në Uashington janë takuar edhe me ish-presidentin amerikan, Bill Clinton, ish-sekretaren, Hillary Clinton, ish-Zëvëndëspresidentin e SHBA-së, z. Albert Gore, ish-Sekretarët e Shtetit, znj. Condoleezza Rice dhe z. John Kerry dhe ish-kongresistin Eliot Engel.
