Kryeministri në detyrë i Kosova, Albin Kurti, ka deklaruar se ka zhvilluar bisedë me Hatixhe Hoxhën lidhur me kandidaturën për president, duke bërë të ditur se ajo është e gatshme të tërhiqet nëse plotësohen disa kushte për sigurimin e nënshkrimeve nga LDK dhe LVV.
Sipas Kurtit, marrëveshja e propozuar parasheh që Lidhja Demokratike e Kosovës të sjellë 15 nënshkrime për kandidaten e saj, ndërsa edhe Lëvizja Vetëvendosje të ofrojë 15 nënshkrime, me qëllim që procesi të çojë drejt zgjedhjes së presidentit.
“Kam biseduar me të (Hatixhe Hoxhën). Ajo është dakorduar të tërhiqet nga kandidatura nëse LDK-ja sjell 15 nënshkrime për kandidaten e saj, kushdo që është, dhe LVV-ja po ashtu 15 nënshkrime. Në këtë mënyrë do të kishim një kandidat nga shoqëria civile dhe një nga LDK-ja, dhe sonte të zgjedhim presidentin e Kosovës. Këtu jam, në zyrën e LVV-së, dhe LDK-ja mund të vijë dhe t’i sjellë nënshkrimet”, ka deklaruar Kurti.
