Kryeministri i Kosovës, Albin Kurti, ka deklaruar se nuk e ka ndryshuar qëndrimin e tij lidhur me Dhomat e Specializuara të Kosovës, të njohura si Gjykata Speciale, që nga pranvera e vitit 2015.
Duke folur në seancën e sotme të Kuvendit të Kosovës, Kurti tha se vazhdon ta konsiderojë këtë gjykatë si të pazakonshme, pasi, sipas tij, ajo herë funksionon si gjykatë vendore e herë si tribunal ndërkombëtar.
“Unë, së pari, si kryeministër i Kosovës dhe si kryetar i subjektit politik fitues, nuk e kam ndryshuar fare qëndrimin për Dhomat e Specializuara apo ligjin për to që nga pranvera e vitit 2015. Qëndrimi im është i njëjtë. Konsideroj se kjo Gjykatë Speciale, këto Dhoma të Specializuara, janë të pazakonshme. Herë sillen si gjykatë vendore e herë si tribunal ndërkombëtar, por gjithsesi janë një gjykatë e veçantë, me mungesë transparence”, deklaroi Kurti.
Ai tha se, sipas bindjes së tij, nismëtarët e ligjit për Dhomat e Specializuara kishin pasur qëllim të mirë, por se kjo nismë kishte ardhur si pasojë e zhgënjimit me aktgjykimin e 16 shtatorit.
“Nismëtarët e ligjit për Dhomat e Specializuara, unë besoj se kanë pasur qëllim të mirë. Ky qëllim ka ardhur nga indinjata e thellë dhe zhgënjimi i madh me aktgjykimin e 16 shtatorit, i cili kishte shumë pasaktësi faktike e historike dhe rezultoi me një dënim shumë të lartë, me gjithsej 81 vjet burgim për ish-krerët e UÇK-së”, u shpreh Kurti.
lajmi ne perditesim…




