Kryeministri i Kosovës, Albin Kurti, në ditën e dytë të pjesëmarrjes në Konferencën e Sigurisë është takuar me drejtorin ekzekutiv të Komitetit Amerikano-Hebre, dhe ish-kongresistin amerikan, Theodore Deutch.
Zyra e Kryeministrit njofton se në takim është folur për arritjet kryesore të qeverisë gjatë dy viteve, përderisa kryeministri Kurti ka ftuar kompanitë izraelite që të eksplorojnë mundësitë për investime në Kosovë.
“Me z. Deutch, kryeministri Kurti foli për arritjet kryesore të qeverisë në këto dy vite. Për progresin ekonomik dhe demokratik, suksesin në luftimin e krimit dhe korrupsionit, përmirësimin në raportet ndërkombëtare dhe reformat në drejtësi dhe sundim të ligjit, që kanë ndikuar pozitivisht në përmirësimin e imazhit të vendit. Në këtë kontekst, ai shtoi se Kosova ofron mundësi dhe mjedis të favorshëm për investitorë të huaj, duke ftuar kështu kompanitë izraelite që të eksplorojnë mundësitë për investime në Kosovë”, thuhet në njoftim.
Deutch e ka uruar kryeministrin Kurti dhe popullin e Kosovës për 15-vjetorin e shpalljes së pavarësisë.
Ai është shprehur mirënjohës për marrëdhëniet dhe lidhjet ndërmjet Kosovës dhe Izraelit.
“Si Komitet, ai tha se mbështesin Kosovën në synimet e saj dhe se janë të gatshëm dhe të vullnetshëm për bashkëpunim”, thuhet tutje në njoftimin zyrtar.
