Kurti ka thënë se nuk ka informata përveç sqarimeve që i ka thënë ministrja Hajdari.
Kurti ka njoftuar se në momentin e aksidentit ministjra në veturë ka qenë me motrën e saj me aftësi të kufizuara, shkruan teve1.info
Tutje Kurti ka thënë se me çka ka kuptuar nuk ka pasur shenja frenimi në asfalt.
“Unë nuk kam të tjera informacione përveç sqarimeve që i ka thënë Hajdari dhe më duhet të them se i besoj. Ka qenë bashkë në veturë me motrën e saj me aftësi të kufizuara dhe me çka kam kuptuar nuk ka shenja në asfalt të frenimit, që do të thotë se nuk ka pasur shpejtësi më tepër se ç’duhet. Policia e ka rastin dhe kamerat e marketit janë aty”, ka deklaruar Kurti.
Edhe ministrja Hajdari ka pranuar se është përfshirë në një aksident, duke thënë se gjatë vozitjes papritmas janë shfaqur dy fëmijë në vrapim për të kaluar rrugën, ku njëri nga ta është përplasur në veturën e saj.
“Për hir të informimit të drejtë, sot në mesditë në rrugën Vicianum në lagjen “Arbëria” të Prishtinës, gjersa po kthehesha me veturën time personale për në banesë, gjatë vozitjes sime pranë Meridian Market, papritmas u shfaqën dy fëmijë në vrapim për të kaluar rrugën, ku fatkeqësisht njëri nga ta u përplas në veturën time. Me shqetësim menjëherë kam reaguar, duke i ofruar ndihmë fëmiut dhe kam lajmëruar Policinë të cilët janë marrë me gjithë evidencën e rastit”, ka shkruar Hajdari në Facebook.
Po ashtu edhe Policia e Kosovës ka dhënë detaje në lidhje me këtë rast.
“Rr. Vicianum, Prishtinë (NN) 10.04.2022 – 12:25. E dyshuara femër kosovare përderisa ishte duke drejtuar veturën, godet viktimën mashkull kosovar. Viktima ka pranuar tretman mjekësor”, ka bërë të ditur Policia e Kosovës./teve1.info
