Kryeministri i Republikës së Kosovës, Albin Kurti, ka pritur sot në takim Michael Wood, nga Mbretëria e Bashkuar, i cili i ka prirë ekipit ligjor të Kosovës para Gjykatës Ndërkombëtare të Drejtësisë në vitin 2010.
Në një komunikatë të lëshuar për media, bëhet e ditur se Kurti ka falënderuar Wood për kontributin e tij, e sidomos për mbrojtjen ligjore të drejtës ndërkombëtare të Kosovës me rastin e shpalljes së pavarësisë.
“Kryeministri Kurti e falënderoi z. Wood për kontributin e tij, veçanërisht në mbrojtjen ligjore të së drejtës ndërkombëtare të Kosovës me rastin e shpalljes së pavarësisë. Opinioni këshilldhënës i GjND-së i vitit 2010 që konkludon se pavarësia e Kosovës nuk kishte shkelur të drejtën ndërkombëtare, përbën një nga datat themelore të historisë së shtetit të Kosovës, andaj, kryeministri Kurti tha se është kënaqësi të mirëpres e të takohet me z. Wood pikërisht në vigjilje të 15-vjetorit të shpalljes së Pavarësisë”, thuhet në komunikatë.
Gjithashtu, Kurti e ka njoftuar Wood lidhur me të arriturat e Kosovës, përfshirë këtu zhvillimet aktuale, reformat e ndërmarra në funksion të zhvillimit ekonomik, luftën kundër krimit dhe korrupsionit dhe për forcimin e demokracisë.
“Ai diskutoi me z.Wood edhe për marrëdhëniet ndërmjet Kosovës dhe Serbisë dhe procesin e dialogut, për të cilin kryeministri tha se Republika e Kosovës në vazhdimësi ka qenë kontruktive dhe kreative në shërbim të normalizimit të plotë të marrëdhënieve me njohje reciproke në qendër”, thuhet tutje.
Ndërsa në këtë takim Wood është shoqëruar nga resktori i Universitetit të Prishtinës, Qerim Qerimi./teve1.info/.
