Kryeministri në detyrë i Kosovës, Albin Kurti, ka falënderuar qytetarët për mbështetjen e dhënë në zgjedhjet e 7 qershorit, pas përfundimit të procesit të numërimit të të gjitha votave.
Përmes një reagimi publik, Kurti e cilësoi rezultatin si konfirmim të besimit qytetar ndaj Lëvizjes Vetëvendosje, duke theksuar se suksesi i arritur është rezultat i mbështetjes së votuesve brenda vendit dhe në mërgatë, si dhe i angazhimit të aktivistëve dhe vullnetarëve të subjektit politik.
“Dje përfundoi procesi i numërimit të të gjitha votave. Ju falenderoj përzemërsisht për besimin e dhënë! Kjo fitore e fuqishme vjen si rezultat i mbështetjes së madhe qytetare brenda Republikës dhe në mërgatë, si dhe angazhimit të mijëra qytetarëve vullnetarë, anëtarëve e aktivistëve të Lëvizjes që nuk u ndalën asnjëherë”, ka deklaruar Kurti.
Ai ka shtuar se rezultati i zgjedhjeve të 7 qershorit ka dëshmuar se nuk ka pasur nevojë për mbajtjen e zgjedhjeve të reja, pasi sipas tij rezultati ka mbetur pothuajse i pandryshuar.
Sipas Kurtit, Lëvizja Vetëvendosje është rikonfirmuar si forca e parë politike në vend me 53 deputetë në Kuvendin e Kosovës.
“Si VETËVENDOSJE! jemi rikonfirmuar si partia e parë, me 53 deputetë, dhe tash presim certifikimin e rezultatit të zgjedhjeve në mënyrë që të nisim punën në drejtim të formimit të institucioneve të reja, për të vazhduar punët e mira dhe projektet zhvillimore”, është shprehur ai./teve1.info/
