Kryeministri i Kosovës, Albin Kurti, ka marrë pjesë në ceremoninë e varrimit të drejtoreshës së Arsimit në komunën e Shtimes, Yllka Fejzullahu, e cila ka ndërruar jetë sot si pasojë e një sëmundjeje të rëndë.
Sipas njoftimit të Kryeministrisë, Kurti ka shprehur ngushëllimet e tij para familjarëve, miqve, kolegëve institucionalë dhe qytetarëve të pranishëm në Shtime, duke e vlerësuar të ndjerën si një figurë të përkushtuar, dashamirëse dhe të palodhshme në punën e saj.
Ai ka theksuar se ndarja nga jeta e Yllka Fejzullahut përbën një humbje të madhe jo vetëm për familjen e saj, por edhe për gjithë vendin në përgjithësi.
“Kryeministri theksoi se që kur e ka njohur Yllka Fejzullahun, ajo nuk është ndalur asnjëherë së punuari dhe vepruari pa e kursyer veten, duke lënë gjurmë të pashlyeshme në angazhimin e saj në Lëvizjen Vetëvendosje, në shoqëri dhe në institucione”, thuhet në njoftim.
Yllka Fejzullahu ka shërbyer si kryetare e organizatës “Gratë për Vetëvendosje”, ndërsa më herët ka qenë këshilltare e ish-ministres së Drejtësisë, Albulena Haxhiu, si dhe asambliste në komunën e Shtimes./teve1.info/
