Në veri, të premten u protestua kundër vendimit të Qeverisë të Kosovës që të mos lejohen zgjedhjet e Serbisë brenda territorit të Kosovës, si dhe për kthimin në punë të gjyqtares Liljana Stevanoviq që u suspendua pasi mori pjesë në takimin e Këshillit të Sigurisë së Serbisë.
Në adresimin e publikuar Kurti i falenderoi për protestën paqësore, duke thënë se më shumë do të besonte në protestën e tyre po që se do të bëhej fjalë për drejtësi sociale, zhvillim më të shpejtë apo për çështjet e krimit të organizuar dhe korrupsionit.
“Ju lutem që të mos ndikoheni nga regjimi autoritar në Beograd. Atyre nuk iu interesojnë të drejtat dhe përfitimi i serbëve në Kosovë. Ata përpiqen ta destabilizojnë Kosovën, për qëllimet e tyre zgjedhore e ndoshta edhe për interesat luftëndjellëse të ndonjë fuqie të madhe. Prandaj qytetarë të dashur, ju ftoj që ta ruani qetësinë dhe të besoni më shumë te Qeveria e Kosovës. Rritja ekonomike, lufta kundër korrupsionit, rritja e eksportit, të ardhurat nga tatimet dhe doganat, rritja e investimeve të huaja dhe e buxhetit të shtetit, na japin shpresë neve që jetojmë këtu. Ne jemi të përkushtuar për avancimin e të drejtave dhe mirëqenies së të gjithë qytetarëve të Kosovës, pa marrë parasysh përkatësinë etnike apo fetare. Dyert tona janë të hapura”, ka thënë Kurti.
