Mbrëmë është hapur zyrtarisht edicioni i 24-të i Festivalit Ndërkombëtar të Filmit Dokumentar dhe të Shkurtër, DokuFest.
Në hapjen e tij në Prizren mori pjesë edhe kryeministri në detyrë, Albin Kurti.
Ai tha se ky festival është shumë i rëndësishëm për zhvillimin kulturor, ekonomik e lokal të vendit.
“DokuFest-i është një motor i rëndësishëm i zhvillimit kulturor, ekonomik e lokal në vend, dhe ka dëshmuar qëndrueshmëri ekonomike, shoqërore e artistike. Festivali gjithashtu ka arritur të rrisë ndikimin e tij në zhvillimin e kinematografisë përmes përfshirjes në programe shkollore, duke ndikuar kështu në rritjen e potencialit të filmbërësve të rinj dhe duke ndërlidhur zhvillimin ekonomik e social nëpërmjet kulturës”, ka shkruar Kurti në Facebook.
Kurti ka thënë se gjatë qeverisjes së tij ngjarjet kulturore kanë pas mbështetje më shumë se në të kaluarën.
“Me reformat tona në fushën e kulturës, organizatat e formësuara sikurse Dokufesti, nga viti 2022 gëzojnë përkrahje thelbësore institucionale. Për një ngjarje kulturore kaq të rëndësishme për vendin, mbështetja institucionale shtetërore gjatë katër viteve të fundit ka qenë më e larta ndonjëherë. Mirënjohje për të gjithë ata që kontribuuan në organizimin e këtij edicioni, dhe ju ftoj të gjithëve ta vizitoni”, ka shkruar Kurti.
