Kryeministri në detyrë i Kosovës, Albin Kurti, ka deklaruar se Dogana e Kosovës ka arkëtuar deri tani 1 miliard e 347 milionë euro të hyra, duke shënuar një rritje prej 6 për qind krahasuar me të njëjtën periudhë të vitit të kaluar.
Përmes një postimi në Facebook, Kurti tha se rritja e të hyrave doganore ka qenë e vazhdueshme, duke theksuar se gjatë periudhës 2021-2025 janë arkëtuar gjithsej 8 miliardë e 380 milionë euro.
“Me 1 miliard e 347 milionë euro të hyra deri tani apo 6% më shumë se sa vitin e kaluar, Dogana e Kosovës po vazhdon me rritjen e pandërprerë dhe të ndjeshme të performancës. Nga viti 2021 deri më 2025, rritja mesatare e të hyrave ka tejkaluar gati trefish normën e rritjes ekonomike, periudhë gjatë së cilës janë arkëtuar gjithsej 8 miliardë e 380 milionë euro”, ka shkruar Kurti.
Sipas tij, gjatë kësaj periudhe janë ndërmarrë edhe reforma për lehtësimin e veprimtarisë së bizneseve.
“Përfshirë përmbylljen e shtetëzimit të terminaleve doganore dhe zbatimin e deklarimit të mallrave para arritjes, i cili ka kontribuar në reduktimin e kohës së procesimit me rreth 70 për qind”, ka shtuar ai.
Në postim, ai ka përmendur edhe forcimin e kontrolleve kufitare dhe përdorimin më të madh të teknologjisë në Doganën e Kosovës.
Sipas tij, funksionalizimi i skanerit në Merdarë ka rritur kapacitetet për identifikimin dhe parandalimin e kontrabandës dhe aktiviteteve të tjera të paligjshme.
“Në vijimësinë e modernizimit, po përparojnë edhe projekte të reja strategjike, përfshirë Dritaren e Vetme Kombëtare, Tranzitin e Përbashkët, automatizimin mëtejmë të proceseve dhe forcimin e kapaciteteve teknologjike të Doganës së Kosovës”, ka theksuar Kurti./teve1.info/
