Kryeministri, Albin Kurti ka thënë se deri më tani mbi 1 milionë qytetarë janë regjistruar në procesin e regjistrimit të popullsisë, ekonomive familjare dhe banesave.
Kurti tha se deri në përmbyllje të procesit kanë mbetur edhe dy javë dhe sic tha ai pjesëmarrja e qytetarëve në regjistrim është e madhe.
“Mbi 1 milion qytetarë të regjistruar, edhe dy javë deri në përfundim të regjistrimit të popullsisë, ekonomive familjare dhe banesave. Sot bëhen 2/3 e procesit të regjistrimit, ndërsa kanë mbetur edhe 14 ditë deri në fund. Pjesëmarrja e qytetarëve është e lartë dhe misioni i ekspertëve të UNECE dhe UNFPA ka konstatuar se Agjencia e Statistikave të Kosovës po bën një punë shembullore në menaxhimin dhe mbarëvajtjen e procesit”, ka thënë ai.
Tutje Kurti ka thënë se ky proces që ndodh çdo dhjetë vjet është vendimtar për planifikimin tonë si shtet dhe progresin tonë si shoqëri.
“Falënderoj secilën dhe secilin regjistrues për dedikimin profesional që kanë shfaqur deri më tani. Ftoj qytetarët që të vazhdojnë t’i përgjigjen pozitivisht ftesës sonë për regjistrim”, ka thënë Kurti.
