Kryeministri Albin Kurti në adresimin e tij në mbledhjen e Qeverisë ka folur për vizitën që e pati në Greqi në 20-vjetorin e Samitit të Selanikut.
Kurti tha se në këtë takim potencoi se njëra prej kritereve të anëtarësimit në BE është fqinjësia e mirë dhe se për këtë duhet të ketë njohje de-jure e de-fakto mes shteteve.
“Në darkën e përbashkët që patëm unë theksova se anëtarësimi i Kosovës në Bashkimin Evropian nuk ka alternativë. Që të gjitha shtetet që aspirojnë anëtarësimin në BE duhet ta zbatojnë demokracinë, sundimin e ligjit, respektimin e të drejtave të njeriut dhe fqinjësinë e mirë. Dhe se për fqinjësi të mirë, demokratike e evropiane është e rëndësishme njohja reciproke de-jure e de-fakto si dhe të drejtat e pakicave në mënyrë simetrike e sipas konventave evropiane”, tha Kurti.
Kurti tutje shtoi se takimi me pjesëmarrjen e presidentit ukrainas Zelenski i kontribuon bashkëpunimit rajonal dhe procesit të integrimit në BE.
“Deeskalimi në katër komunat në veri të vendit praktikisht ka ndodhur ndërkohë që Kosova është duke e respektuar Marrëveshjen e Bratisllavës. Në prag të Samitit të Berlinit në Tiranë në këtë tetor, takimi në Athinë me pjesëmarrjen e presidentit Zelenski i kontribuon bashkëpunimit rajonal dhe procesit të integrimit në BE. Për Kosovën pjesëmarrja në Athinë dhe takimet e nivelit të lartë në pallatin Maximus përbëjnë edhe një hap tjetër drejt avancimit të marrëdhënieve mes Kosovës dhe Greqisë”, shtoi tutje ai, përcjell teve1.info.
Kurti foli edhe për situatën në veri teksa tha se tani duhet parandaluar rieskalimi.
“Në takimet bilateral dhe darkën e përbashkët po ashtu theksova se deeskalimi në katër komunat në veri është rezultat në njërën anë i arrestimit të elementëve të dhunshëm që sulmuan policinë, ushtarët e KFOR-it dhe gazetarët si dhe në anën tjetër i largimit të një pjese të ekstremistëve të dhunshëm për në Serbi. Tani duhet parandaluar rieskalimi. Kur s’ka protesta të dhunshme të planifikuara e të organizuara nga Beogradi zyrtar nuk ka eskalim në veriun e Kosovës”.
