Me radhë, delegatët kanë shënuar emrat e tyre para fillimit të mbledhjes së 64-të të Këshillit të Përgjithshëm të Lëvizjes Vetëvendosje.
Ministra, deputetë, kryetarë komunash dhe delegatë të tjerë u mblodhën të shtunën për të diskutuar çështje të ndryshme partiake dhe politike.
Ndonëse mbledhja ishte paraparë të niste në orën 12:00, kryetari i Vetëvendosjes, njëherësh kryeministri i Kosovës, Albin Kurti, arriti rreth një orë më vonë.
Në fjalën e hapjes, Kurti iu referua edhe vrasjes së Arlinda Zekajt. Ai tha se ky rast e ka përballur shoqërinë edhe një herë me dështimin për t’i mbrojtur gratë, edhe kur ato kërkojnë ndihmë nga institucionet.
“Vrasja e Arlinda Zejkajt na ka përballur edhe një herë me një të vërtetë të rëndë se një grua mund të ndjekë të gjitha rrugët që i parasheh ligji, të denoncojë dhunën, të kërkojë mbrojtje, madje të paralajmërojë me shkrim se i rrezikohet jeta dhe prapë të përfundojë e vrarë”, tha Albin Kurti.
Në këtë mbledhje, Kurti foli edhe për aktgjykimin ndaj katër ish-krerëve të Ushtrisë Çlirimtare të Kosovës, të cilin e cilësoi të padrejtë juridikisht dhe moralisht.
“Shkuarja në zgjedhje u dëshmua të jetë e kotë, por, kësaj radhe, mosshkuarja në to ishte edhe më e ndërgjegjshme për kontekstin që u prodhua pas aktgjykimit për katër krerët e Ushtrisë Çlirimtare të Kosovës (Hashim Thaçi, Kadri Veseli, Jakup Krasniqi, Rexhep Selimi). Aktgjykim ky i padrejtë juridikisht e moralisht dhe i pasaktë historikisht e faktikisht”, shtoi Kurti.
Kreu i ekzekutivit foli edhe për buxhetin e vitit 2027, duke paralajmëruar se Qeveria do ta miratojë projektligjin për ndarjet buxhetore.
Sipas tij, ky buxhet do të ketë në fokus investimet kapitale dhe zhvillimin ekonomik.
“Ky është buxhet i rrugëve, hekurudhave dhe urave. E për herë të parë, buxheti për investime kapitale do të tejkalojë vlerën 1 miliard euro. Do të jetë buxhet edhe për komunat, me gjithsej 908 milionë euro”, theksoi Kurti.
Ndër të tjera, në mbledhjen e Këshillit të Përgjithshëm pritet të diskutohen edhe zgjedhjet e brendshme të Lëvizjes Vetëvendosje.
