Kryeministri i Kosovës, Albin Kurti, ka thënë se bombardimet e NATO-s mbi Jugosllavinë e kanë bërë Kosovën një kapitull të rëndësishëm në historinë e NATO-s.
25-vjet pas intervenimit të NATO-s mbi ushtrinë serbe e cila po kryente vrasje, masakra e dëbim ndaj civilëve, Kurti ka thënë se anëtarësimi i Kosovës në NATO është i pashmangshëm.
“Bombardimet e NATO-s mbi Jugosllavi nga 24 marsi deri më 10 qershor 1999, e kanë bërë Kosovën një kapitull më vete dhe tejet të rëndësishëm në historinë e NATO-s. Andaj natyrshëm dhe pashmangshëm, Kosova duhet të bëhet edhe pjesëmarrëse aktive në historinë e NATO-s, duke u anëtarësuar në këtë aleancë. Kjo është aspiratë e Republikës së Kosovës që duhet realizuar: sa më shpejt, aq më mirë! Për NATO-n në Kosovë dhe për Kosovën në NATO”, ka shkruar Kurti në Facebook.
Në një shkrim për intervenimin e alencës më të madhe ushtarake në botë, Kurti ka thënë se ato erdhën me një karakter humanitar që kishte për qëllim “ta ndalonte gjenocidin që po e kryente shteti i Serbisë okupatore ndaj shqiptarëve vendas në Kosovë”.
