Kryeministri i vendit, Albin Kurti ka zhvilluar një bisedë me të dërguarin e Mbretërisë së Bashkuar për Ballkanin Perëndimor, Stuart Peach, me ç’rast kanë diskutuar për sulmet e djeshme në veri ndaj KFOR-it, policëve dhe gazetarëve.
Përmes një postimi në Twitter, Kurti ka thënë se ”në një demokraci nuk ka vend për dhunë fashiste”, përcjell teve1.info
“Qytetarët e të gjitha etnive kanë të drejtë në shërbim të plotë dhe të papenguar të zyrtarëve të tyre të zgjedhur”, ka deklaruar ai.
Që nga dita e premte, qytetarë të shumtë serbë kanë protestuar para këtyre tri objekteve komunale në Zveçan, Zubin Potok e Leposaviq, teksa dje pati edhe sulme të dhunshme ndaj KFOR-it, si dhe ndaj gazetarëve.
Numri i pjesëtarëve të KFOR-it të lënduar dje gjatë protestave në Zveçan ka shkuar në 30.
Sipas njoftimit të tyre, 11 ushtarë nga kontingjenti italian dhe 19 nga kontingjenti hungarez kanë pësuar lëndime të shumta, duke përfshirë thyerje dhe djegie nga mjetet ndezëse shpërthyese të improvizuara.
Tre ushtarë hungarezë u plagosën nga përdorimi i armëve të zjarrit, teksa bëhet e ditur se lëndimet e tyre nuk janë të rrezikshme për jetën. /Teve1.info/
