Kryeministri i Kosovës, Albin Kurti ka thënë se Kosova ka pasur përmirësimin më të madh gjatë qeverisjes së tij 4 vjeçare.
Ai ka thënë se në nga aspekti socio-ekonomik, kulturor, i sigurisë, i sovranitetit dhe i tërësisë territoriale, nuk ka qenë kurrë gjendja më e mirë
“Sot, në Kosovë, nga aspekti socio-ekonomik, kulturor, i sigurisë, i sovranitetit dhe i tërësisë territoriale, nuk ka qenë kurrë gjendja më e mirë. Asnjëherë nuk kemi pasur përmirësim më të madh sesa në këto katër vjet të qeverisjes sonë”, ka thënë Kurti në një tubim elektoral të mbajtur në Prishtinë të dielën.
Sipas komunikatës së LVV-së, Kurti ka folur edhe për zhvillimin ekonomik, rritje e të hyrave tatimore që sipas Kurtit kanë kaluar mbi 3 miliardë.
“E kemi gjetur ekonominë me më pak se 7 miliardë euro, ndërsa tani ka mbi 10 miliardë. Eksportet, vitin e kaluar, kanë kaluar 1 miliardë euro; të hyrat tatimore kanë kaluar 3 miliardë; ndërkaq investimet e huaja direkte janë rritur për më shumë se 130%. Gjatë mandatit tonë kemi pasur afër 700 milionë euro investime të huaja direkte, ndërsa para nesh, mesatarja vjetore nuk kishte arritur as 300 milionë euro. Kjo është një rritje prej mbi 2.3 herë”, tha Kurti.
Kurti ka thënë se kanë rritur edhe numrin e të punësuarve duke përmendur edhe investimet në bujqësi e arsim.
“Jo vetëm kaq, rritja jonë ekonomike ka ndikuar drejtpërdrejt në shtimin e punësimit. Nga 350 mijë të punësuar, sa kishim gjetur në pranverën e vitit 2021, sot kemi 430 mijë, pra një rritje gati 23%. Kjo rritje është shprehur kryesisht tek gratë dhe tek të rinjtë, pasi ky ka qenë synimi ynë: gratë dhe të rinjtë të punojnë sa më shumë, në çdo cep të Kosovës. Pagën minimale e gjetëm 130 dhe 170 euro, ndërsa ne e kemi bërë 350 euro. Në mandatin e ardhshëm, paga minimale do të bëhet 500 euro. Programin “Superpuna” për të rinjtë do ta zgjerojmë me “Superpuna për gratë”. Pra, për gratë që duan të punojnë në sektorin privat, në ndërmarrje të ndryshme, për 6 muaj si bonus do ta marrin pagën minimale mbi pagën që ia jep punëdhënësi”, tha Kurti, thuhet në komunikatë.
