Kryeministri në detyrë, Albin Kurti ka bërë të ditur se rreth 3 milionë euro janë duke u investuar në masa të efiçiencës së energjisë, projekt nga i cili pritet të përfitojnë mbi 1,400 qytetarë në Kosovë.
Kurti ka njoftuar se deri më tan në kuadër të këtij projekti, janë rinovuar 51 shtëpi të familjeve të cenueshme, me një investim prej rreth 610 mijë eurosh.
Njëra prej familjeve përfituese është familja Dragidella në Prishtinë. Sipas Kurtit, kjo familje para renovimit konsumonte mbi 85 MWh energji në vit, ndërsa pas përfundimit të punimeve pritet të kursejë rreth 74 për qind të energjisë.
“Deri në fund të këtij viti, do t’i përkrahim 192 familje duke ua rinovuar shtëpitë dhe deri në vitin 2028 ky numër do të arrijë në 280 familje në mbarë Kosovën”, ka deklaruar Kurti.
Ai ka bërë të ditur se përfitues të projektit do të jenë familjet që marrin asistencë sociale, me përparësi për familjet me pensionistë, personat me aftësi të kufizuara dhe prindërit vetushqyes.
Kurti ka falënderuar Qeverinë e Danimarkës, UNDP-në, Ministrinë e Ekonomisë dhe Fondin e Kosovës për Efiçiencë të Energjisë për mbështetjen në realizimin e projektit.
Sipas tij, investimet në efiçiencën e energjisë synojnë uljen e konsumit dhe shpenzimeve për energji, duke përmirësuar njëkohësisht kushtet e jetesës për familjet më të cenueshme./teve1.info/
