Kreu i Lëvizjes Vetëvendosje dhe kandidati për kryeministër, Albin Kurti, ka deklaruar se partia e tij synon të arrijë një fitore të madhe në zgjedhjet e 28 dhjetorit, madje më të madhe se ajo e 9 shkurtit.
Gjatë tubimit përmbyllës të fushatës, Kurti përmendi disa nga arritjet që ai i ka vlerësuar si suksese të qeverisjes së tij. Ai tha se qeveria e tij ka forcuar integritetin e territorit, ka rikthyer besimin te institucionet, ka rritur sovranitetin e shtetit dhe ka ndihmuar zhvillimin ekonomik duke përmirësuar punësimin dhe arsimimin.
“Na ka mbetur edhe pak punë për të bërë, por me kaq shumë mbështetje, nuk ka sfidë që nuk mund ta kapërcejmë”, deklaroi ai.
Kurti gjithashtu premtoi ndarjen e një miliard eurosh për siguri, si dhe rritjen e shtesave për fëmijët dhe për nënat që sapo kanë lindur.
