Gjykata Supreme në Vranjë e ka zhvilluar sot seancë e fundit lidhur me dy filmat e aktorit shqiptar dhe producentit të filmave “Heshtja vret” dhe “I pabesi”, Gani Veseli, premiera e të cilëve është ndaluar në Bujanoc nga Prokuroria e Serbisë.
Veseli në emisionin “Ditari” në Tëvë 1 tha se seanca ka zgjatur 4 orë e gjysmë dhe të hënën do të jepet vendimi përfundimtarë.
“Nga ora 11:00 kemi pasur seancën, ka zgjatur 4 orë e gjysmë. Ka qenë një seancë e ngarkuar jashtëzakonisht shumë me kyçje të njëpasnjëshme. Sot ka prezantuar edhe kryeprokurorja e lëndës që e ka marrë…zakonisht ka qenë tema të ‘I pabesi’, që kryeprokurorja insiston që të mos shfaqet në Republikën e Serbisë duke aluduar se prek ndjenjat ndërnacionale, fetare, ku absolut sot gjatë gjithë kohës kam insistuar dhe e kam hedhur poshtë. Natyrisht se është tendenca e vazhdueshme se filmi është i kohës modern siç e quajnë ata, që realisht nuk është…Prandaj sot ka qenë tendenca e vazhdueshme dhe ka kërkuar vazhdimisht që ky film nuk duhet që të jepet në Serbi për arsyeje që ka elemente që prek ndjenja ndërnacionale dhe nuk len nacionalitetet të krijojnë jëtë të përbashkët sipas saj. Sot ka qenë seanca e fundit që e përfunduam dhe realisht kjo ka qenë pak a shumë seanca e tretë… është përfundimtare, pra është caktuar të hënën që të merret vendimi. Gjykatësja lypi kohë dhe e quajti se nuk është vendim i lehtë për këtë film”.
Ai tha se sipas të gjitha gjasave fati i këtij filmi do të jetë që të mos shfaqet në Preshevë, ndërsa të filmi “Heshtja Vret” janë kategorik që të largohet logoja e Kosovës.
“Mirëpo nuk mund ta heq logon e Kosovës, sepse Kosova është financuese direkte e filmave”, ka thënë ai.
Tema e filmit të parë është momenti kur disa të rinj, gjatë grabitjes, vrasin dajën e tyre dhe vrasja zbulohet pas 20 vjetësh. Ndërsa filmi i dytë, sipas Veselit, flet për një personazh të pasionuar pas armëve dhe për mikun e tij të ngushtë, i cili e denoncon në polici.
“Këta filma janë thjesht të realizuar në Maqedoni të Veriut. Këtu marrin pjesë aktorë nga Kosova, Lugina e Preshevës dhe Maqedonia e Veriut”, ka thënë Veseli.
Filmat janë xhiruar në kuadër të një projekti në vlerë të rreth 40.000 eurove, me mbështetje të Këshillit Kombëtar të Shqiptarëve në Serbi, dhe janë financuar nga Qeveria e Kosovës.
