Korridoret nëpër të cilat kaluan për të marrë armatim në Shqipëri, e kullat ku qëndruan në kohë lufte, bashkëluftëtarët i kujtojnë pikërisht në Lubizhdë të Hasit. Në këtë fshat dhanë jetën 54 shqiptarë, u strehuan qindra ushtarë të UÇK-së.
Udhën e shkeli me shumë shokë gjatë luftës.
Qëllimi i vushtrriasit, Fikri Hajrizit ishte të merrte armatim nga Shqipëria.
“UÇK kur u formu në fshatin Strovc të komunës së Vushtrrisë, atëherë jemi nisë për armatim për Shqipëri. Në këtë fshatin Lubizhdë kemi qenë rreth 100 vetë. Rrugëtimi ka qenë 2 javë ditë. Në fshatin Cahan, komuna e Krumës, aty jemi armatosë. Pas tri dite që kemi nejt në fshatin Cahan jemi ardhë këndej. Rrezik ka qenë, po mbi të tëra është liria”, tha ish-luftëtari, Fkri Hajrizi.
E me t’u kthyer në Lubizhdë të Hasit, ish-ushtari i UÇK-së ia behu shtëpisë së parë që pa.
Përkundër kontrolleve nga ushtria serbe, konaku i familjes Kajdonqi ishte i hapur për luftëtarët.
“Kanë ardhë kah gjysma e natës, kanë trokitë në derë, kemi dalë ia kemi hapë dyert dhe kanë nejt këtu deri të nesërmen në mbrëmje. Vazhdimisht ju tregojmë nipave e mbesave që këtu kanë nejt, ju kemi dhënë bukë ushtrisë tonë”, tha Nike Muharemi nga familja Kajdonqi.
Ndërsa për çështje sigurie, ushtarët u detyruan të lëvizin nga ajo shtëpi.
“Kanë ardhë më kanë njoftu mu, unë i kam strehu me një shtëpi tjetër për çështje sigurie për shkak se çështja e transportit ka qenë pak e vështirë edhe kishte me ardhë një grup tjetër pas dy dite prej Shqipërie. Qëllimi ishte me i bërë bashkë me atë grupin edhe me vazhdu tutje për në zonat tjera të luftës, me i përcjell”, tha Isuf Kajdonqaj.
E 25 vite pas, ish-luftëtarët e UÇK-së shkuan sërish në atë strehë.
Tashmë gati e shkatërruar, por në luftë –për ta ishte shtëpi e qëndresës.
Nëpërmes njërës nga arteriet kryesore të UÇK-së kaluan edhe shumë ushtarë të plagosur.
“Kemi hy në fshat, i kemi marrë telat e teshave, na kanë dhuru vet banorët e fshatit na kanë dhuru ato qebet e veta ku kanë flejt vet. I kemi marrë edhe i kemi improvizu si lese edhe me ato i kemi rregullu së bashku me major Hasanin dhe disa shokë të tjera të njësisë sonë të Landovicës edhe me to i kemi ngarku të plagosurit dhe i kemi bart për Shqipëri”, tha ish-luftëtari, Faik Berisha.
Në Lubizhdë të Hasit u ekzekutuan 54 shqiptarë.
Në kujtim të tyre, në fshat është vendosur gurëthemeli i kullës-muze ‘’Kulla e Qëndresës’’.
