Eksperti i çështjeve të sigurisë, Ilir Kulla, në emisionin “Matrix” në Tëvë1, ka deklaruar se ushtria izraelite nuk ka arritur të fitojë ndaj Hamasit, pavarësisht kohëzgjatjes së luftës.
“Po të kishte fituar ushtria izraelite, lufta do të kishte përfunduar. Fakti që ende vazhdon, tregon se nuk është arritur rezultati i synuar,” u shpreh Kulla.
Ai vuri në dukje se edhe pas gati një viti e gjysmë konflikti, ushtria izraelite ende nuk ka arritur të lirojë pengjet, ndërsa lufta ka ndikuar negativisht në gjendjen ekonomike të Izraelit dhe ka ndarë shoqërinë izraelite në qëndrime të ndryshme.
“Ekonomia izraelite është përkeqësuar si pasojë e luftës. Shoqëria është thellësisht e ndarë dhe tani nevojitet një rrugëdalje politike, jo thjesht ushtarake,” theksoi Kulla.
Ai shtoi se Perëndimi po shfaq pakënaqësi në rritje ndaj qasjes së Izraelit, por kjo nuk duhet të interpretohet si antisemitizëm.
“Askush nuk është kundër Izraelit. Përkundrazi, Perëndimi ka qenë gjithmonë përkrahës i tij – kjo u dëshmua edhe në konfliktin me Iranin,” tha më tej Kulla.
Kulla theksoi nevojën për një zgjidhje afatgjatë dhe të qëndrueshme, që të parandalojë izolimin ndërkombëtar të Izraelit dhe të sjellë qetësim në rajon.
