Drejtori i Global Crisis Group, Ilir Kulla, ka deklaruar se masakra e Srebrenicës përbën një nga dështimet më të mëdha të lidershipit evropian dhe një njollë të rëndë në historinë e Evropës.
Në emisionin “Matrix” në Tëvë1, Kulla ka thënë se Srebrenica mbetet një nga ngjarjet më tragjike jo vetëm gjatë shpërbërjes së ish-Jugosllavisë, por edhe në historinë e Evropës moderne.
Sipas tij, dështimi i komunitetit ndërkombëtar për të mbrojtur banorët e Srebrenicës ishte pasojë e mungesës së vendimmarrjes dhe lidershipit politik.
“Srebrenica është një nga ngjarjet më të trishta të ndodhura jo vetëm gjatë periudhës së shpërbërjes së Jugosllavisë, por edhe në zemër të Evropës, pikërisht në një kohë kur shpresa më e madhe ishte se, me ardhjen e regjimeve demokratike dhe rënien e regjimeve diktatoriale, gjërat do të përmirësoheshin. Në secilin prej këtyre varreve do të gjesh ndërgjegjen e munguar të liderëve të asaj kohe dhe mungesën e lidershipit evropian. Rasti i Srebrenicës është turpi i kësaj klase drejtuese evropiane, e cila, sa herë kthen kokën pas, duhet të mendojë se çfarë ka bërë”, ka deklaruar Kulla.
Ai ka theksuar se forcat paqeruajtëse të angazhuara për mbrojtjen e Srebrenicës ishin nën komandën franceze dhe holandeze, ndërsa ka kritikuar, sipas tij, qasjen e disa liderëve evropianë ndaj Sllobodan Millosheviqit gjatë luftërave në ish-Jugosllavi.
Kulla ka shtuar se viktimat e konflikteve zakonisht janë qytetarët e thjeshtë, duke e cilësuar Srebrenicën si një kujtesë të pasojave të mungesës së reagimit ndërkombëtar.
“Sa herë që e kujtojmë Srebrenicën, duhet të kujtojmë se forcat e ngarkuara për mbrojtjen e banorëve të saj ishin forcat franceze dhe holandeze. Kjo tregon për një lidership evropian që nuk arrinte të merrte vendime. Gjithashtu, kishte një pjesë të lidershipit evropian, kryesisht të majtë, që e shihte Sllobodan Millosheviqin jo si një kriminel, por si ‘Shoku Sllobo’, që, sipas tyre, po i rezistonte neokolonializmit amerikan. Fatkeqësisht, si në çdo luftë, faturën e paguajnë njerëzit e pafajshëm”, ka përfunduar ai./teve1.info/
