Eksperti i çështjeve Ilir Kulla, në emisionin “Matrix” në Tëvë1, në moderim nga Mehmet Kalisi ka folur për konfliktin mes Iranit dhe Izraelit, duke analizuar rolin e Shteteve të Bashkuara të Amerikës në këtë përballje.
I pyetur nëse SHBA ka mekanizma për ta kontrolluar konfliktin që të mos dalë jashtë kontrollit, Kulla tha se situata është e ndërlikuar dhe varet nga veprimet e palëve në terren.
“Edhe ka edhe s’ka. Çështja është se Izraeli kur ndan mendjen për të bërë një gjë dhe e bën fakt të kryer ndaj SHBA-së, por çështja është a do të dëmtohet më shumë presidenti Trump nëse e braktis Izraelin apo do të dëmtohet më shumë nëse i qëndron pranë”, ka thënë Kulla.
Sipas tij, zgjidhja e krizës do të duhej të vinte përmes negociatave të ndara dhe me garanci ndërkombëtare për të dy palët.
“Duhet të ketë negociata të ndara dhe të dyja palët duhet të garantojnë rezultat, sepse deri tani, nëse Izraeli ka prishur dy apo tri herë marrëveshjet për armëpushim me Gazën dhe Libanin, është e qartë që palët ndërmjetëse nuk mund të japin garanci pa pasur Izraelin në masë dhe në anën tjetër. Irani ka kapacitete të mëdha, por edhe SHBA-ja po ashtu, ndërsa Irani është një vend shumë i madh me kapacitete të frikshme”, u shpreh ai.
I pyetur nëse, në rast të kundërshtimeve nga Benjamin Netanyahu, Donald Trump do të mbështeste opozitën, Kulla e përjashtoi këtë mundësi.
“Nuk ka asnjë mundësi që Trump të mbështesë kandidatët e opozitës, pasi investimin më të madh e ka me Netanyahun. Sigurisht, nëse do të kishte një fitore të opozitës, Trump do të kishte marrëdhënie të mira me ta, por në kushtet aktuale kjo nuk është e mundur”, tha Kulla.
