Eksperti i çështjeve të sigurisë, Ilir Kulla, në emisionin “Matrix” në Tëvë1, ka diskutuar për situatën e shqiptarëve në Luginën e Preshevës, si dhe për konfliket në këtë rajon, duke përmendur Preshevën dhe Bujanocin. Ai theksoi se, pavarësisht llojit të regjimit që kanë përdorur serbët, projekti i tyre kombëtar ka mbetur i njëjtë: zhdukja e shqiptarëve.
“Serbët, pavarësisht gjuhës që përdorin ose regjimit që kanë pasur, kanë një projekt kombëtar shumë të qartë. Ky projekt është ose zhdukja e shqiptarëve, ose asimilimi i tyre, ose edhe moslejimi i krijimit të një shteti shqiptar. Nëse sot ekziston projekti i zhbërjes së shtetit të Kosovës, në të kaluarën nuk ka ekzistuar një projekt për zhbërjen e shtetit shqiptar”, tha Kulla.
Ai gjithashtu përmendi se, në rastin e konflikteve të mëparshme në Luginën e Preshevës, serbët nuk e kanë pranuar humbjen dhe shqiptarët kanë qëndruar të pranishëm në ato territore.
