Drejtori i Global Crisis Group, Ilir Kulla, ka reaguar lidhur me fotografinë e tij që ka qarkulluar ditët e fundit në rrjetet sociale, ku ai shfaqet me një shenjë “X” në fytyrë dhe me mbishkrimin: “Sheshi nuk është zonë e lirë, por Shqipëri e lirë”.
Në emisionin “Matrix” në Tëvë1, të moderuar nga Mehmet Kalisi, Kulla tha se fotografia lidhet me protestat që po zhvillohen prej disa javësh në Shqipëri dhe se, sipas tij, ai është vënë në shënjestër pavarësisht se nuk ka qenë kundër protestuesve.
“Është një fotografi e imja, në të cilën ata që protestojnë prej 51 ditësh në shesh, me të drejtën e tyre politike, më kanë anatemuar edhe mua. Unë nuk kam qenë kundër këtyre protestave, por kam thënë vazhdimisht se nuk dal në shesh, sepse ai shesh kërkon që edhe unë të largohem nga sistemi. Ata kanë të drejtë të kërkojnë largimin e një sistemi dhe ne duhet t’i dëgjojmë e të dialogojmë me ta, por nuk mund të mendoj se zgjidhja është kaosi dhe anarkia”, ka deklaruar Kulla.
Ai e cilësoi publikimin e fotografisë si një formë bullizimi, duke shtuar se nuk beson se sulmet personale mund të sjellin ndryshime politike.
“Ajo që kanë bërë është një lloj dhune përmes bullizimit ndaj personazheve të caktuara. Nuk mendoj se në këtë mënyrë ndërtohet shteti. Unë vazhdoj të besoj se të rinjtë duhet të dëgjohen. Janë bërë shumë gjëra të mira, por edhe shumë gabime”, është shprehur ai.
Kulla tha se polemikat ndaj tij nisën pas një komenti që bëri lidhur me një deklaratë të një eurodeputeteje gjatë vizitës së saj në Tiranë.
“Kjo nisi pasi erdhi një eurodeputete në Tiranë dhe unë përdora një shprehje popullore. Nuk kishte të bënte personalisht me zotin Arlind Qorri, për të cilin kam respekt. Ishte një rastësi me mbiemrin e tij dhe nuk kishte për qëllim ta fyente”, ka thënë Kulla.
Në fund, ai theksoi se nuk ndihet i frikësuar nga sulmet në rrjetet sociale apo nga bullizimi publik.
“Kanë zgjedhur personin e gabuar. Unë nuk kam pasur frikë nga plumbat, e jo më të kem frikë nga bullizimi. Nuk më kanë heshtur as Edi Rama e as Sali Berisha, edhe pse kam qenë kritik ndaj tyre. E vetmja gjë që arrijnë me këto sulme është të më bëjnë edhe më të fortë”, ka deklaruar Kulla.
