Eksperti i çështjeve të sigurisë, Ilir Kulla, i ftuar në emisionin “Matrix” në Tëvë1, të moderuar nga Mehmet Kalisi, ka komentuar gjuhën e trupit dhe mënyrën e komunikimit të kryeministrit shqiptar Edi Rama gjatë një takimi të fundit me qytetarët.
Sipas Kullës, reagimi i Ramës ndaj kritikave dhe influencerëve është pasojë e modelit politik që ai vetë ka ndërtuar ndër vite.
“Të duket mënyrë e duhur për t’iu përgjigjur popullit? Problemi është se ai e prishi Partinë Socialiste dhe ndërtoi këtë sistem ku lideri komunikon përmes rrjeteve sociale dhe platformave sociale. Nuk ka rëndësi se cila është partia. Këta influencerë i ka bërë vetë të fuqishëm, sepse i ka mbajtur me para njerëzit e tij. Tani ata janë kthyer kundër tij dhe ai nervozohet. Ka të drejtë pse nervozohet”, ka deklaruar Kulla.
Ai ka komentuar edhe akuzat që Rama ka adresuar ndaj personave të ndryshëm nga Shqipëria, Maqedonia e Veriut dhe Kosova, duke thënë se kryeministri po kërkon vazhdimisht fajtorë për problemet me të cilat përballet.
“Nuk ka rëndësi se kë akuzon, sepse atij i vjen fantazia dhe nuk ka asnjë problem ta bëjë këtë. Problemi është se ai mundohet të shohë se ku ka diçka që nuk funksionon. Ka njerëz që i kanë dalë kundër, ndonëse për shumë vite kanë qenë shumë të lidhur dhe shumë afër me të. Disa prej tyre vazhdojnë të kenë lidhje me të, por janë futur në protesta dhe kjo tregon se ka diçka që nuk funksionon te ai dhe te mënyra se si ai po vepron”, tha Kulla.
Më tej, ai vlerësoi se sistemi politik i ndërtuar nga Rama është mbyllur dhe nuk po lejon hapësirë për zëra të rinj.
“Unë mendoj se sistemi është mbyllur dhe nëse nuk hapet, të gjithë ata njerëz mbeten jashtë sistemit. Në këto kushte, e vetmja rrugë që u mbetet është protesta ose ndërhyrja e Prokurorisë së Posaçme”, përfundoi Kulla./ teve1.info/
