Drejtori i Global i “Crisis Group”, Ilir Kulla, ka vlerësuar figurën e veprimtarit Adem Demaçi, në 8-vjetorin e ndarjes së tij nga jeta.
I ftuar në emisionin “Matrix” në Tëvë1, në moderim të Mehmet Kalisit, Kulla ka thënë se Demaçi ishte një nga figurat më të rëndësishme të shekullit të kaluar për rezistencën e shqiptarëve të Kosovës dhe procesin që çoi drejt krijimit të shtetit të Kosovës.
Sipas Kullës, Demaçi ishte një figurë e vendosur, patriot dhe qëndrestar, i cili vuajti burgun duke e konsideruar sakrificën e tij si shërbim ndaj një kauze më të madhe.
“Një nga figurat më të rëndësishme që ka prodhuar shekulli që shkoi për themelimin e shtetit të Kosovës dhe për rezistencën e shqiptarëve të Kosovës ka qenë Adem Demaçi. Ai ishte një njeri i vendosur, patriot, qëndrestar dhe i qartë në bindjet e tij”, ka thënë Kulla.
Ai ka theksuar se Demaçi ishte një nga njerëzit që nuk kërkoi pushtet pas shpalljes së pavarësisë së Kosovës, por, sipas tij, kërkoi vetëm që t’i njihej kontributi historik.
“Sa më shumë të kalojë koha, aq më shumë do të rritet figura e tij. Është nga ata njerëz që nuk kërkoi pushtet pasi Kosova u bë shtet, por kërkoi dhe besoj se meriton t’i njihet kontributi i tij historik në të gjitha hapësirat ku jetojnë shqiptarët”, ka deklaruar Kulla.
Adem Demaçi u nda nga jeta më 26 korrik 2018, ndërsa për dekada ishte një prej figurave kryesore të rezistencës politike shqiptare në Kosovë./teve1.info/
