Turqia ka arrestuar shtetasin kosovar, Liridon Rexhepin nën dyshimet se ka transferuar para tek operativët e agjencisë izraelite të inteligjencës Mossad në Turqi.
Agjencia turke e inteligjencës dyshon se Rexhepi ka lehtësuar transferet financiare nga shtetet e Evropës Lindore, kryesisht nga Kosova, për tek agjentët e Mossadit në Turqi.
Për këtë, eksperti i Politikave të Sigurisë dhe i Gjeopolitikës, Ilir Kulla, thotë se Rexhepi është viktimë nga shumë viktima të tillë të luftërave të shërbimeve nëpër botë.
Sipas tij, nëse Rexhepi është arrestuar për t’i thënë izraelitëve që “ne e kemi marrë vesh se kë keni në territor dhe kë keni paguar”.
“Nëse është arrestuar Liridoni, është arrestuar për t’i thënë nga turqit izraelitëve që ne e kemi marrë vesh se kë keni në territor dhe kë keni paguar gjatë kësaj kohe dhe mos bëni atë që bëtë në Teheran, pra të vrisni njërin nga krerët e Hamasit, sepse krerët e tjerë të Hamasit janë në Turqi, sepse tëherë mund të ndërhyjmë. Pra, unë më shumë sesa Liridonin agjendë të Mossad-it e shoh viktimë të luftërave të shërbimeve. Ai është biznes si çdo biznesmen tjetër ka parë për të bërë një biznes. Ti mendon se ata që i kanë qëndruar mbrapa i kanë treguar Liridonit këto lloj sekrete pse nuk e dinë ata që në momentin e parë Liridoni i tregon të gjitha. Nëse Mosaad-i është serioz nuk mund ta bëj këtë gjë”, tha Kulla në emisionin “Matrix”.
Kulla është shprehur i bindur se të tillë si Liridon Rexhepi ka shumë në botë.
“Nëse Liridoni ka hyrë në një bashkëpunim biznesi kjo vjen si rrethojë e kësaj gjëje. Unë të garantoj që nëpër botë ka shumë kështu. Pra, është viktimë nga shumë viktimave të tillë të luftërave të shërbimeve nëpër botë. Kjo quhet dëm kolateral”, shtoi ai.
Ndërkohë, paratë e transferuara nga Rexhepi raportohet të jenë përdorur për mbledhje të informacioneve në Siri, për kryerjen e operacioneve psikologjike kundër palestinezëve dhe koordinimin e operacioneve që lidhen me dronët.
Raportohet se Rexhepi përdori shërbime për transferimin e parave për në Turqi. Kur arriti në këtë shtet, paratë u shpërndanë tek operativët në terren, të cilët në këmbim, i dërguan këto para tek asetet në Siri, shpesh duke përdorur kriptovaluta për t’i realizuar këto transfere.
Që nga janari, autoritetet turke kanë arrestuar dhjetëra persona, përfshirë edhe hetues privatë, nën akuzat se kanë mbledhur të dhëna për individë, kryesisht për palestinezë që jetojnë në Turqi, dhe ato të dhëna ia kanë dërguar inteligjencës izraelite.
Izraeli nuk i ka komentuar arrestimet e bëra në Turqi. /teve1.info/
