U ndërtua 89 vite më parë.
Kjo kullë në Bllacë të Suharekës, u bë simbol i rezistencës në kohën kur po jetësoheshin me ngulm planet serbe për largimin e shqiptarëve nga Kosova.
Me ndërtimin e saj, veprimtari i çështjes kombëtare, Ramë Bllaca, po shprehte hapur kundërshtimin e tij ndaj kolonizimit të territorit me serbë e malazezë.
Por pikërisht ky veprim i kushtoi me jetë deputetit të atëhershëm të parlamentit jugosllav.
“Ramë Bllaca është një ndër figurat që i kalon dimensionet nacionale, për shkak të veprës së tij që ka bërë në kohën kur veprimet e Serbisë binin ndesh me çfarëdo të drejte ndërkombëtare. Pra ai ka ngulitë aty për t’u dhënë shembullin të tjerëve se nuk duhet larguar nga trojet e veta, siç ishte politike jugosllave e asaj kohe”, thotë historiani Fadil Bytyçi.
Por gjendja e kullës që u ndërtua gati nëntë dekada më parë nuk është e mirë.
Ndonëse renovimi i jashtëm është bërë para pak vitesh, shkallët në hyrje të kullës janë thyer.
Ndërsa dhomat e katit të poshtëm janë mbushur me mjete shtëpiake.
Të dëmtuara mbeten edhe muret e brendshme të kësaj kulle.
Mure të qara janë edhe në katin e sipërm të shtëpisë së Ramë Bllacës.
“Cilin nga turistët e huaj do ta dërgonim për t’i treguar se çfarë vepre ka bërë Ramë Bllaca dhe kjo është simbolika e veprës së tij, kur sheh një gjendje të tillë. Prandaj është alarmi i fundit për institucionet që duhet të merren me ruajtjen e trashëgimisë kulturo-historike që të ndërmarrin veprimet e tyre të caktuara në funksion të valorizimit të vlerave historike tonat”, shprehet Bytyqi, raporton Tëvë1.
Megjithatë, që prej disa vitesh, ky monument ruhet nga MKRS.
Shtëpia e Ramë Bllacës është përfshirë në listën e trashëgimisë kulturore nga Ministria e Kulturës për vitin 2024/2025.
Tëvë1 ka pyetur në MKRS se a është në plan të fillojë me fazën e renovimit në ambientet e brendshme të këtij objekti, mirëpo deri në publikimin e kronikës të njëjtët nuk kanë kthyer përgjigje.
E në përkujtim të veprës së Ramë Bllacës, në mes të fshatit Bllacë është vendosur pllaka përkujtimore, me porosinë për të cilën veprimtari flijoi edhe jetën.
