Eksperti i çështjeve të sigurisë, Ilir Kulla, ka folur për situatën politike në Kosovë dhe për dështimin e formimit të qeverisë në emisionin “Matrix” në Tëvë1.
Kulla theksoi se tashmë ishte parashikuar se VV-ja do të fitonte zgjedhjet, por nuk do të mund të formonte qeverinë:
“Nëse na kthejnë videot e ato që kemi bërë në emisionin tuaj, unë kam thënë se zgjedhjet i fiton VV-ja, por qeverinë nuk do ta bëjnë dot. Kjo mosha e adoleshencës tregon një shkallë të lartë të papjekurisë së klasës politike në përgjithësi, të atij që ka fituar dhe atyre që nuk kanë fituar.”
Ai shtoi se problemi qëndron në raportin mes përgjegjësisë publike dhe asaj që quhet politika:
“Çështja është se raporti mes asaj që quhet përgjegjësi publike dhe politike tregon se, pavarësisht se politika kërkon kompromis, nuk mund të vendosen vija të kuqe. Kosova nuk ka luksin dhe shansin të mbajë vendin pezull për 9 muaj për interesa të vogla publike, ndërkohë që kjo ka ngadalësuar totalisht ekonominë dhe ka rritur pasigurinë.”
Kulla kritikoi klasën politike për paaftësi në marrjen e vendimeve dhe theksoi se vendi ka nevojë për bashkëpunim dhe përgjegjësi për të mirën e qytetarëve, për të shmangur dëme në ekonominë dhe stabilitetin e vendit.
