Sot janë kujtuar Policët e Kosovës të rënë në detyrë.
Kjo ditë u shënua me homazhe e vizita te varret dhe familjarët e policëve.
26 korriku është dita kur u vra polici Enver Zymeri gjatë një operacioni të Policisë së Kosovës në veri të vendit, pranë pikës kufitare të Bërnjakut.
Një tjetër policë i Kosovës u vra gjatë një përballje me grupe serbe të armatosura. Afrim Bunjaku u vra më 24 shtator 2023 në sulmin terrorist në Banjsë.
Aktivitetet përkujtimore filluan me homazhe shtetërore pranë Lapidarit të Zyrtarëve Policorë të Rënë në Krye të Detyrës, në Drejtorinë e Përgjithshme të Policisë së Kosovës në Prishtinë.
Homazhe dhe vendosje kurorash me lule bënë ushtruesja e detyrës së Presidentes së Republikës së Kosovës, Albulena Haxhiu, Kryeministri në detyrë i Republikës së Kosovës, Albin Kurti, Ministri i Punëve të Brendshme, Xhelal Sveçla, Drejtori i Përgjithshëm i Policisë së Kosovës, Kolonel Gazmend Hoxha dhe përfaqësues të tjerë.
Në vazhdën e aktiviteteve, delegacioni institucional i përbërë nga Kryeministri në detyrë i Republikës së Kosovës, Albin Kurti, Ministri i Punëve të Brendshme, Xhelal Sveçla, Drejtori i
Përgjithshëm i Policisë së Kosovës, Kolonel Gazmend Hoxha, Zëvendësdrejtori i Përgjithshëm i Policisë së Kosovës, Fehmi Hoti dhe përfaqësues të tjerë, bënë homazhe pranë varrit të Heroit të Kosovës, rreshterit Afrim Bunjaku, ku u vendosën kurora me lule në shenjë nderimi dhe respekti për sakrificën e tij. Më pas u zhvilluan vizita në familjen e Heroit Afrim Bunjaku dhe në familjen e Heroit Enver Zymeri, duke shprehur mirënjohje të thellë për kontributin dhe sakrificën e tyre në mbrojtje të Republikës së Kosovës.
Homazhe u bënë edhe pranë lapidarit në vendin e rënies së Heroit Enver Zymeri në Varagë të Zubin Potokut, ku u përkujtua heroizmi dhe përkushtimi i tij në mbrojtjen e rendit kushtetues dhe sovranitetit të vendit.
Në kuadër të shënimit të kësaj dite memoriale, Drejtori i Përgjithshëm i Policisë së Kosovës, Kolonel Gazmend Hoxha, së bashku me Zëvendësdrejtorin e Përgjithshëm të Policisë së Kosovës, Fehmi
Hoti, morën pjesë në ceremoninë e zbulimit të shtatores së Heroit Enver Zymeri në Kampin e Njësive Speciale në Mitrovicë. Kjo shtatore përfaqëson një simbol të përhershëm të guximit, sakrificës dhe përkushtimit të zyrtarëve policorë në mbrojtje të Republikës së Kosovës.
