Deri më tani janë mbledhur 51.822.579 denarë për përkrahje të viktimave nga zjarri në Koçan dhe familjeve të tyre, njoftoi sot Kryqi i Kuq.
Ata bëjnë të ditur se janë në fazën përgatitore për pagesën fillestare të mjeteve të grumbulluara për nevojat më urgjente të destinuara për të prekurit nga zjarri.
Ata bëjnë thirrje që të gjithë që të vazhdojnë të tregojnë humanizëm dhe solidaritet për viktimat dhe të shprehin mirënjohjen më të thellë për të gjithë ata që dhuruan.
Qeveria njoftoi se të gjitha familjet e prekura nga tragjedia fillimisht do të marrin nga 150 mijë denarë (2.430 euro), transmeton AlsatMk.
Sipas raportit të Institutit të Mjekësisë ligjore, arsyeja e vdekjes është ngulfatja me gaz monoksid karboni, i cili është liruar nga djegia e materialeve të objektit.
Lidhur me tragjedinë e Koçanit, ministri i Punëve të Brendshme, Pançe Toshkovski tha se policia në bashkëpunim me prokurorinë do të hetojë çdo detaj.
Ndërkohë, autoritetet po vazhdojnë kontrollet në diskoteka dhe kabare në gjithë vendin, ku nga 23 objekte të licencuara, 13 prej tyre nuk i plotësojnë kushtet minimale dhe po përgatiten vendime për heqjen e licencës.
Një protestë është thirrur për ditën e hënë nga Shoqata “Kush e ka radhën”, ku do të kërkojnë drejtësi për viktimat në Koçan.
Katër ditë më parë, mijëra qytetarë u mblodhën në Sheshin Maqedonia, për të nderuar me 16 minuta heshtjeje viktimat. Heshtja zgjati 16 minuta duke simbolizuar 16 marsin kur dhe ndodhi tragjedia. Përveç Shkupit, tubime të ngjashme pa fjalime pati edhe në disa qytete në Maqedoninë e Veriut.
