Kryeziu në emisionin “De Jure” në Tëvë1, tha se në Aeroportin Ndërkombëtar të Prishtinës “Adem Jashari” kishte punuar qysh nga viti 2008, ku kishte mbajtur pozitën si udhëheqës i ngarkimit.
“Na thirrën në telefon me ardhë në administratë, shkuam, aty na konfirmuan se kontrata nuk ju vazhdohet, në atë kontratë shënonte se nuk e ke përfillur rregulloren e punës. Cilën rregullore për shembull, aty nuk shkruan nëse e kam shkel rregulloren e punës, atëherë janë masat tjera, është komisioni disiplinor, vërejtja me shkrim, vërejtja me gojë. Mirëpo, ajo ka qenë thjesht hakmarrje, unë në rend të parë si nënkryetar i Sindikatës që me ligj edhe Inspektorati e ka cekur që unë kam pasur imunitet dhe veç me bë vepër unë normal bëj vepër ndëshkohem, por pa asnjë arsye, kjo ka qenë arsyeja”, tha ai.
Që mosripërtëritja e kontratës për Hamëz Kryeziun ka qenë në kundërshtim me ligjin, e kanë aprovuar edhe Inspektorati i Punës dhe Gjykata Themelore në Prishtinë, dega në Lipjan. Të dyja këto institucione e kanë vërtetuar se me vendimin për mosripërtëritje të kontratës është shkelur Ligji i Punës, saktësisht neni 10, meqë Kryeziu ka qenë punëtor në aeroport për më shumë se 10 vite dhe kontrata e tij është dashur të jetë me afat të pacaktuar.
Për më shumë, ndiqeni hulumtimin “Hakmarrja e Limak-ut ndaj punëtorëve”, i cili transmetohet në “Tëvë1” dhe “Betimi për Drejtësi”./Tëvë1/
