Zëdhënësi i Qeverisë së Kosovës, Përparim Kryeziu, ka reaguar për deklaratën e Bashkimit Evropian lidhur me aksionin e Policisë së Kosovës të hënën në veri të Kosovës.
Ai ka deklaruar se thirrja e Shërbimit Evropian të Veprimit të Jashtëm që strukturat ilegale të trajtohen me Asociacion është paraqitje mashtruese e asaj se si është menduar Asociacioni.
“Sugjerimi i Shërbimit të veprimit të jashtëm të BE-së (EEAS) në deklaratën e sotme që strukturat ilegale në Kosovë duhet të trajtohen dhe zgjidhen përmes Asociacionit, është një paraqitje mashtruese e asaj që Asociacioni ishte menduar ndonjëherë të ishte”, tha Kryeziu.
Ai tha se Asociacioni nuk është i menduar si “një ombrellë për legalizimin e strukturave të krijuara në mënyrë të paligjshme dhe të njëanshme”.
“Fatkeqësisht, deklarata vetëm validon destruktivitetin e Serbisë përgjatë gjithë dialogut, veçanërisht në takimet e fundit në Bruksel për Rregulloren e Bankës Qendrore për operacionet me para në Kosovë – të cilat kanë dështuar saktësisht për shkak të qëndrimit të Serbisë, i cili shkon kundër vetë propozimit të BE-së”, tha ndër të tjera Kryeziu.
Ai tha se sundimi i ligjit nuk duhet të perceptohet si sjellje përshkallëzuese.
“Është ironike që BE-ja të reagojë kundër veprimeve që janë në përputhje me sundimin e ligjit, kur misioni më i madh civil i BE-së quhet Misioni i Bashkimit Evropian për Sundimin e Ligjit në Kosovë (EULEX)”, ka deklaruar ai.
Ndryshe, Polica të hënën ka kryer një operacion ndaj institucioneve financiare serbe në veri të Kosovës, që rezultoi me mbylljen e gjashtë objekteve të Bankës Kursimore të Postës dhe Bankës Popullore të Serbisë në katër komunat në veri të Kosovës, të banuar me shumicë serbe.
Gjatë aksionit, që autoritetet e Kosovës thanë se kishte të bënte me vendosjen “e rendit dhe ligjshmërisë”, u konfiskuan prova të ndryshme, përfshirë para.
Policia e Kosovës, që bashkëngjiti fotografi të parave të konfiskuara, tha se u gjeti “rreth 1.600.000 euro, rreth 74.700.000 dinarë serbë (mbi 600.000 euro), rreth 19.500 franga, rreth 13.800 dollarë amerikanë, rreth 40 dollarë australianë”.
The EEAS’ suggestion in its statement today—that illegal structures in 🇽🇰 must be dealt w/ & resolved in conjunction w/ ASMM—is a misleading representation of what ASMM was ever meant to be. For one, it isn’t an umbrella for legalizing illegally & unilaterally created structures.
— Perparim Kryeziu (@KryeziuPerparim) May 21, 2024
