Presidentja e Kosovës, Vjosa Osmani ka mandatuar të propozuarin e VV-së për kryeministër të Kosovës, Glauk Konjufcën.
Për këtë, deputetja e LVV-së, Arbreshë Kryeziu – Hyseni ka deklaruar se partia e saj kërkon bashkëpunim prej të gjitha subjekteve politike për të dalë nga ky ngërç politik tash e ca muaj.
Në një intervistë në emisionin “Mesditë” në Tëvë1, Kryeziu – Hyseni tha se LVV nuk kërkon marrëveshje për koalicione mes partive opozitare.
“Bëhet fjalë për një qeveri e cila nuk do të kërkon marrëveshje për koalicionet prej partive të tjera politike, por do të kërkojë bashkëpunim prej të gjitha subjekteve politike që të dalim prej situatës e cila për asnjë nevojë është krijuar për muaj të tërë tashmë në mënyrë që të ecim tutje me votimin e buxhetit dhe planit të rritjes. Mendoj që deputetët dhe partitë opozitare duhet të ndryshojnë këtë qasje dhe ta kuptojnë që karshi krejt kësaj bllokade për muaj të tërë tashmë i vetmi subjekt politik që ka lëvizur përpara dhe që gjithmonë ka tentuar të ofrojë alternativë ka qenë LVV”, ka deklaruar Kryeziu – Hyseni.
Derisa, kjo e fundit kritikoi partitë opozitare, pasi sipas saj, të martën reaguan vrullshëm ende pa u zyrtarizuar emri i Glauk Konjufcës për mandatar për kryeministër.
Tutje, ajo kërkoi nga këto parti opozitare që të ndryshojnë qasjen dhe u bëri thirrje kolegëve deputetë që të reflektojnë për ta votuar Konjufcën për kryeministër.
“Është momenti që këto partitë opozitare të cilat me vrulle reaguan dje ende pa u zyrtarizuar se ne ndërruam emrin a po jo të mandatarit për kryeministër, duhet ta ndryshojnë qasjen dhe është shumë e rëndësishme ta bëjnë një gjë të tillë në të kundërtën po mendoj që ndëshkimin më të madh do ta marrin ata pikërisht prej qytetarëve me votë në një palë zgjedhjeve të reja të cilat do t’i nënshtrohemi kurdo që të jetë momenti për të hyrë. Po iu bëjë thirrje kolegëve të mi deputet që të reflektojnë dhe që të veprojnë në favor të interesit të qytetarëve sepse mendoj që është momenti për të lënë anash çfarëdo interesi personal që deputetët mund të kenë”, shtoi ajo tutje./teve1.info/
