Kryetarja e partisë së ekstremit të djathtë, Alternativa për Gjermaninë (AfD), Alice Weidel, u bëri thirrje ukrainasve që jetojnë në Gjermani të kthehen në vendin e tyre, veçanërisht të rinjve në moshë ushtarake.
Duke folur në një intervistë me kanalin televiziv austriak AUF1 të dielën, Weidel kritikoi barrën financiare të pagesave të mirëqenies për ukrainasit në Gjermani.
“Më shumë se një milion ukrainas në Gjermani po marrin përfitime sociale. Është në të vërtetë e pabesueshme dhe asnjë nga këto nuk është më e qëndrueshme financiarisht”, tha ajo, citon Anadolu.
“Edhe këta ukrainas duhet të kthehen. Sidomos burrat e rinj ukrainas në moshë ushtarake – po flasim për numra gjashtëshifrorë – këta të rinj duhet të kthehen me mirësi”, shtoi ajo.
Weidel bëri thirrje gjithashtu që sirianët që jetojnë në Gjermani të kthehen në Siri sapo të mos ekzistojnë më bazat për mbrojtjen e tyre.
“Për qytetarët sirianë që erdhën tek ne, sapo arsyeja e ikjes nuk ekziston më në vendin e tyre të origjinës, këta njerëz duhet të kthehen”, tha ajo.
Ajo argumentoi se azili është një e drejtë e përkohshme dhe se njerëzit duhet të kthehen në vendet e tyre kur të pushojnë së ekzistuari arsyet për azil, në vend që të natyralizohen.
Ëeidel tha se nën një qeveri të udhëhequr nga AfD, qytetarët sirianë do të pritej të ktheheshin në Siri në vend që të qëndronin përgjithmonë në Gjermani.
Ajo tha gjithashtu se një qeveri e AfD-së do të shqyrtonte natyralizimin e sirianëve për të përcaktuar nëse kriteret ishin përmbushur siç duhet, duke thënë se partia kishte “dyshime të konsiderueshme” për disa raste.
