Kryetari i Komunës së Vitisë, Sokol Haliti, ka komentuar situatën politike aktuale në vend gjatë një interviste në emisionin “Ditari” në Tëvë1, duke theksuar nevojën për një Qeveri profesionale dhe stabile që do të menaxhonte në mënyrë efikase situatën e krijuar.
“Vendit i duhet një Qeveri profesionale, e cila di të menaxhojë situatën, resurset dhe veprimtarinë shtetërore – jo njerëz që ditën e parë nisin punën pa i njohur proceset”, deklaroi Haliti.
Ai shtoi se Lidhja Demokratike e Kosovës (LDK) është një parti serioze dhe e përgjegjshme, e cila në çdo bashkëpunim potencial me partitë e tjera kërkon stabilitet institucional dhe qartësi politike.
“LDK-ja kërkon që përmes një Qeverie Tranzicioni të zhbllokohet situata aktuale dhe të krijohet një platformë e përbashkët për dalje nga kriza. Është momenti që të dëgjohet zëri i LDK-së, sepse ka qenë gjithmonë parimore në qëndrimet e saj,” u shpreh Haliti.
Sipas tij, një qasje e tillë do të mundësonte afrim ndërpartiak dhe vendosjen e një baze të qëndrueshme për rifunksionalizimin e institucioneve dhe kthimin e besimit të qytetarëve.
