Nura në një lidhje direkte në Tëvë1, tregoi cilat fshatra janë goditur më së shumti nga vërshimet.
“Sot gjendja është stabilizuar falë edhe mungesës së shiu. Dëmet janë të mëdha, flasim për vlera milionëshe. Statistika të sakta ende nuk kemi. Fshatrat më të prekura si Kuqica, Klina e Epërme, Klina e Mesme dhe Klina e ulët, Llausha, Tushila deri në Aqarevë. Pastaj përfshirë pjesa e Runikut, Kllodernicës dhe fshatrave në kuadër të bashkësisë lokale të Turiqevcit”, ka deklaruar ai duke theksuar edhe pjesët e qytetit.
Sipas tij, autoritetet qendrore kanë shprehur mbështetjen e tyre për ndihmë.
“Komunat kanë kapacitete të limituara sa i përket rasteve të tilla. Kemi pasur komunikim me autoritetet qendrore, fatkeqësisht dje kemi pasur vonesa shpresojë që këto, kudo që ndodhin mos të ndodhin sepse intervenimi do të duhej të ishte më i shpejt. Jemi të koordinuar, kemi mbështetje të paktën sot në takime që kam pasur me autoritete qendrore që do të dalin në ndihmë dhe do të përkrahin kompensimin e dëmeve dhe çdo gjë që është e nevojshme”, tha Nura.
Më tej, kreu i Skenderajt shtoi se 120 familje janë akomoduar te farefisi i tyre dhe te qytetarët e tjerë që nuk janë prekur nga vërshimet.
“Dje te qytetarët e Skenderajt është manifestuar një solidaritet i paparë. Kryesisht familjet që i kemi evakuuar janë sistemuar te farefisi apo edhe te qytetarët që nuk kanë qenë pjesë e vërshimeve. Nuk ka pasur kërkesë për akomodim të tillë sepse 120 familje janë akomoduar te farefisi dhe te qytetarët e tjerë”, përfundoi Nura. /Teve1.info/
