Forcat paqeruajtëse të KFOR-it e kanë rrethuar objektin e komunës së Leposaviqit.
Pak metra më larg tash e tre ditë po qëndrojnë serbët lokal, të cilët po protestojnë kundër emërimit të kryetarëve të rinj shqiptar në komunat veriore të vendit.
Megjithatë gjatë së mërkurës u pa një numër më i vogël i protestuesve serb.
Në këtë protestë prezent ishin edhe disa prej zyrtarëve të Listës Serbe, partisë më me ndikim në mesin e komunitetit serb.
Gjatë ditës përfaqësues të Listës Serbe patën një kërkesë për ushtarët e KFOR-it.
E kjo kërkesë u miratua nga ushtarët, të cilët asistuan ti nxjerrin jashtë makinat që iu kishin mbetur të bllokuara tash e sa ditë brenda komunës serbëve lokal.
Por ani pse veturat u nxorën dikush mbeti brenda në këtë objekt tash e tri ditë.
Në disa raste serbët lokal po e thërrisnin atë që të dalë nga komuna, derisa ishin duke pirë pije alkoolike e dëgjuar muzikë nacionaliste.
Përfaqësuesit e Listës Serbe kanë thënë se do t’i vazhdojnë protestat derisa të përmbushen kërkesat e tyre, përkatësisht tërheqja e njësiteve speciale të Kosovës nga veriu dhe tërheqja e kryetarëve të rinj.
Ndryshe, Gjykata Themelore në Prishtinë ka caktuar një muaj paraburgim për dy serbët që u arrestuan të hënën për shkak të dhunës në protestën në Zveçan.
