Në ditën e shënimit të 28 Nëntorit, Kryetari i Drenasit, Ramiz Lladrovci, ka bërë një postim të gjatë në rrjetet sociale, ku ka kritikuar disa krerë të shtetit dhe personalitete të tjerë për pozat e tyre atdhetare, duke i cilësuar ato si “artificiale”.
Lladroci ka thënë se tri ditë atdhetar në vit janë të pamjaftueshme për të përballuar gjendjen aktuale të Kosovës dhe se këto data janë shfrytëzuar më shumë për fushata politike sesa për të kontribuar në zhvillimin real të shtetit.
Kryetari i Drenasit ka theksuar se këto ditë, përveç që janë përshëndetur si ditë festive, janë bërë gjithashtu “provokuese” për ata që synojnë votat e qytetarëve, sidomos në prag të zgjedhjeve. Ai ka theksuar se kapja e vullnetit qytetar nëpërmjet flamurit kombëtar është më e lehtë sesa dëshmia e një pune të sinqertë gjatë vitit apo një mandati të plotë.
“Çfarë kemi bërë ndërmjet dy 28 nëntorëve? Çka kemi ndryshuar? Kjo datë madhështore bëhet më provokuese për ata që e synojnë votën me 28 dhjetor,” ka shkruar Lladroci.
Në postimin e tij, ai gjithashtu ka ngre shqetësimin për gjendjen e shtetit të Kosovës, duke kërkuar për më shumë angazhim dhe veprime konkrete për përmirësimin e kushteve për qytetarët.
“Pyes, si një nga ata që nuk i deshti plumbi, çfarë do të duhej të bënim menjëherë që shteti ynë të ishte më i suksesshëm, hapësirë më e lumtur për të rinjtë tanë, hapësirë më optimiste për familjet e Kosovës?”
Lladroci ka theksuar se, përtej festimeve, duhet të punohet vazhdimisht për një shtet më të drejtë, më efikas dhe më të suksesshëm për qytetarët e Kosovës.
“Tri herë në vit atdhetar nuk mjafton, dhe as 365 ditë nuk janë të mjaftueshme,” ka shkruar ai. Ai ka shtuar se është e nevojshme të jemi atdhetarë jo vetëm për tri ditët më të shënuara të vitit, si 28 nëntori, 17 shkurti dhe 5 marsi, por çdo ditë me veprime konkrete për zhvillimin e vendit.
Në fund, Lladroci ka apeluar për një angazhim më të madh dhe për një punë më të përkushtuar për të realizuar idealet e atdhetarizmit dhe lirisë të cilat kanë dhënë shumë heronj të kombit.
“Atdhetar me vepra – me punë, me efikasitet në përmbushjen e përgjegjësive gjatë 365 ditëve, na jep shpresë se mund të përmbushim shekullin tonë të jetës, punës dhe atdhetarizmit, duke e bërë Kosovën shtet të denjë, ashtu siç e deshtën ata që u sakrifikuan për lirinë e Kosovës.”
Kryetari i Drenasit ka përfunduar duke shprehur bindjen se heronjtë dhe qytetarët e Kosovës meritojnë më shumë se tri ditë atdhetarizëm simbolik gjatë vitit dhe se duhet të kontribuohet më shumë për një të ardhme më të mirë për vendin.
