Kryetari i bashkisë së Stambollit dhe figura kryesore e opozitës në Turqi, Ekrem İmamoğlu, është dënuar me 20 muaj burg për fyerje dhe kërcënim ndaj prokurorit publik të qytetit, sipas një dokumenti gjyqësor të siguruar nga Agence France-Presse, transmeton The Guardian.
Ky rast është një nga një sërë akuzash të ngritura kundër Imamoglut, rivalit kryesor të presidentit të vendit, Rexhep Tajip Erdogan . Ai tashmë është duke u mbajtur në paraburgim për një hetim mbi dyshime për korrupsion.
Arrestimi i tij në mars si pjesë e atij rasti shkaktoi protestat më të këqija në rrugë në Turqi në më shumë se një dekadë.
Seanca dëgjimore e së mërkurës u mbajt në kompleksin e gjykatës dhe burgut të Silivri-t në periferi perëndimore të Stambollit, ku İmamoğlu është mbajtur që nga arrestimi i tij.
Ai u burgos për një vit, pesë muaj e 15 ditë për fyerje të një nëpunësi civil dhe dy muaj e 15 ditë për kërcënime, tregoi dokumenti i gjykatës.
Imamoğlu, i cili u paraqit në gjykatë, i ka mohuar të gjitha akuzat. Ai thotë se është vënë në shënjestër për shkak të planeve të tij për të sfiduar Erdoganin në zgjedhjet presidenciale të vitit 2028.
Prokurori fillimisht kishte kërkuar që Imamoğlu të përballej me deri në shtatë vjet e katër muaj burg dhe t’i ndalohej të mbante poste publike.
Ky ndalim, i cili vendoset kur një i dyshuar merr një dënim minimal prej dy vitesh burgim, nuk u zbatua.
İmamoğlu u zgjodh kryetar bashkie i Stambollit në vitin 2019 dhe u rizgjodh në vitin 2024. Ai u arrestua më 19 mars në lidhje me një hetim për korrupsion dhe akuza për lidhje me terrorizmin.
