Fillimisht u mblodhën disa metra larg sheshit “Skënderbeu”.
S’vonoi shumë e më pas në këmbë, u nisën edhe më afër objektit të Qeverisë.
Këta qytetarë, këtë të martë, aty erdhën për një qëllim.
Një protestë po mbahej në organizimin e Asociacionit të Komunave të Kosovës, për të kundërshtuar bllokimin e buxhetit, të hyrave vetanake e investimeve kapitale.
Të pranishëm qenë disa kryetarë komunash, por jo edhe të atyre që udhëhiqen nga Lëvizja Vetëvendosje.
Pak minuta pas nisjes së protestës, protestuesve iu bashkuan edhe deputetë të Partisë Demokratike të Kosovës dhe Aleancës.
Kryetari i Prishtinës, Përparim Rama, tha se komunat që udhëhiqen nga Vetëvendosje po trajtohen ndryshe sa i përket investimeve.
“Çfarë paradoksi, çfarë marrëzie. E nuk po flasim për investimet që bën qeveria në komunat e saj, larg saj. Çfarë investime ka bërë, përveç në ato që i kontrollon vetë? Po flasim për paratë e qytetarëve që i paguajnë qytetarët përmes tatimit dhe nuk mund të investohen në qytetet e tyre, sepse ua ka bllokuar Albin Kurti për me i ndëshku politikisht, se s’e keni votuar, s’e keni votuar. Tash i bllokon”, ka thënë Rama.
Ndërkaq, kryetari i Ferizajt, Agim Aliu deklaroi se pasojat e situatës financiare po i bartin qytetarët.
“Mjaft më me plagën financiare të komunave pa fajin e obligimeve të tyre, që po desfunksionalizon e shkatërron qeverisjen lokale si tërësi. Komunat nuk janë të kryetarëve. Komunat janë të qytetarëve të tyre”, u shpreh Aliu.
Në protestë u ngritën edhe shqetësimet për dëmet e shkaktuara nga fatkeqësitë natyrore.
Kryetari i Rahovecit, Smajl Latifi bëri të ditur se shumë qytetarë e biznese ende nuk janë kompensuar.
“Komunat nuk mund t’i kompensojnë dëmet e mëdha të shkaktuara nga fatkeqësitë elementare natyrore. Pas vlerësimit nga komisionet komunale, raportet dhe kërkesat i dërgohen nivelit qendror. Prej atij momenti përgjegjësia për vendimmarrjen dhe sigurimin e mjeteve është në duart e qeverisë. Fatkeqësisht, shumë qytetarë, fermerë, biznese dhe komuna ende nuk janë kompensuar”, theksoj Latifi.
Pas përfundimit të protestës, kryetarët e komunave në krye me të parin e kryeqytetit, u futën në objektin e Qeverisë për t’ia dorëzuar kryeministrit në detyrë Albin Kurti shtatë kërkesat e tyre.
Ndër kërkesat e AKK-së për Qeverinë janë që t’i kompensojë obligimet financiare që burojnë nga kontrata kolektive, kompensimi retroaktiv për normën e përvojës së punës prej 0.5 për qind nga marsi i vitit 2023, si dhe rishikimi i kritereve të grantit specifik për arsim.
Pas rreth një ore protestë, tubimi u përmbyll në mënyrë paqësore dhe protestuesit u shpërndanë.
