Kryeministri i Republikës së Kosovës, Albin Kurti, ka pritur në takim ministrin e Punëve të Jashtme të Belgjikës, Maxime Prévot.
Sipas njoftimit të Zyrës së Kryeministrit, Kurti e ka falënderuar Prévot për mbështetjen e vazhdueshme të Belgjikës ndaj Kosovës para dhe pas luftës, si dhe para dhe pas shpalljes së pavarësisë.
Ai ka veçuar strehimin e refugjatëve shqiptarë gjatë luftës dhe kontributin e Belgjikës në kuadër të misionit të KFOR-it në Kosovë.
Në kuadër të marrëdhënieve dypalëshe, Kurti ka theksuar se Kosova është e interesuar për thellimin e bashkëpunimit ekonomik dhe krijimin e lehtësirave për investime, duke marrë parasysh edhe mërgatën e mirë-integruar në Belgjikë.
Ai ka përmendur marrëveshjen për eliminimin e tatimit të dyfishtë, të nënshkruar së fundmi në margjinat e Takimeve Pranverore në Washington DC, dhe shprehu gatishmërinë për marrëveshje të reja në sektorë të ndryshëm.
Kurti ka thënë se Brukseli, si kryeqytet i BE-së dhe institucioneve ndërkombëtare, është me rëndësi të veçantë për Kosovën.
Ai ka ritheksuar se anëtarësimi në Bashkimin Evropian mbetet prioritet strategjik dhe se avancimi i aplikimit përmes dhënies së statusit të vendit kandidat duhet të jetë hapi i radhës.
Po ashtu, Kurti ka theksuar përkushtimin e Kosovës për anëtarësim në Këshillin e Evropës dhe në NATO.
