Zyrtarë nga vendet perëndimore dhe arabe, Kombet e Bashkuara dhe organizatat joqeveritare u mblodhën në Paris të enjten për një konferencë mbi mënyrën e dhënies së ndihmës për civilët në Rripin e Gazës.
Me këtë rast kryeministri palestinez Mohammad Shtayyeh i bëri thirrje komunitetit ndërkombëtar që të ndihmojnë për t’i dhënë fund luftës Izrael-Hamas.
Shtayteh tha se ekziston një shkelje e qartë e ligjit ndërkombëtar humanitar në Gaza nga Izraeli.
“Sa palestinezë duhet të vdesin që lufta të ndalet? A do të mjaftojë të vriten nga gjashtë fëmijë çdo orë? A do të mjaftojë të vriten katër gra për një orë? A do të jetë e mjaftueshme për të vrarë 10,000 njerëz në 30 ditë? Që është më shumë se të vrarët në Ukrainë në 530 ditë. A do të mjaftojë plagosja e 25 mijë njerëzve? Disa prej të cilave do të vdesin për shkak të mungesës së ilaçeve. A do të mjaftojë një muaj pa ilaçe, pa ujë, pa rrymë e strehim? Ekziston një shkelje e qartë e ligjit ndërkombëtar humanitar nga Izraeli dhe po kryhen krime kundër popullit të pafajshëm palestinez”, ka thënë Shtayyeh.
Gjatë kësaj konference nikoqiri presidenti francez Emmanuel Macron i bëri apel Izraelit që të mbrojë civilët palestinezë duke thënë se “të gjitha jetët kanë vlerë të barabartë” dhe se lufta kundër terrorizmit “nuk mund të kryhet kurrë pa rregulla”.
Mbi 50 vende po marrin pjesë në këtë konferencë, por Izraeli nuk është ftuar.
Franca dëshiron që konferenca e ndihmës të adresojë nevojat në rritje të enklavës palestineze të rrethuar, duke përfshirë ushqimin, ujin, furnizimet shëndetësore, energjinë elektrike dhe karburantin.
