Kryeministri në detyrë i Republikës së Kosovës, Albin Kurti, priti sot në takim Ambasadorin e Gjermanisë në Kosovë, Jörn Rohde, me të cilin bisedoi për zhvillimet e fundit politike në vend, përfshirë çështjen e konstituimit të Kuvendit dhe marrëveshjet ndërkombëtare që presin miratim.
Sipas njoftimit të Zyrës së Kryeministrit (ZKM), Kurti theksoi rëndësinë që konstituimi i legjislaturës së nëntë të Kuvendit të përmbyllet sa më parë, duke e cilësuar si proces të domosdoshëm për funksionimin demokratik të institucioneve.
“Kryeministri numëroi përpjekjet dhe veprimet e ndërmarra për konstituimin e Kuvendit, përfshirë takimet me liderët politikë dhe pjesëmarrjen në takimin e thirrur nga presidentja e vendit, në përputhje me aktgjykimin e fundit të Gjykatës Kushtetuese,” thuhet në komunikatë.
Gjatë takimit, Kurti ka informuar ambasadorin Rohde edhe për kërcënimin me bombë që është adresuar ndaj Kuvendit të Kosovës gjatë fundjavës. Ai theksoi se, sipas institucioneve të sigurisë, numri i telefonit nga i cili është bërë kërcënimi është i regjistruar në Serbi dhe i përket kompanisë telefonike MTS, duke konfirmuar se origjina e kërcënimit është serbe.
Në fund të takimit, Kurti dhe ambasadori gjerman diskutuan edhe për marrëdhëniet bilaterale ndërmjet Kosovës dhe Gjermanisë, si dhe për bashkëpunimin në fusha të ndryshme, me theks të veçantë në sundimin e ligjit.
