Kryeministri i Polonisë, Donald Tusk ka deklaruar se SHBA-ja ka premtuar përgjigjje ushtarake në rast se Rusia shkel një marrëveshje të mundshme armëpushimi, ka raportuar të martën transmetuesi TVP World.
“Për herë të parë dëgjova nga goja e negociatorëve amerikanë se Amerika do të përfshihet në garancitë e sigurisë për Ukrainën në një mënyrë të tillë që rusët nuk do të kenë dyshim se (në rast të shkeljes së armëpushimit) përgjigja amerikane do të jetë ushtarake nëse rusët sulmojnë përsëri Ukrainën”, u tha Tusk gazetarëve ndërsa po largohej nga Gjermania.
Deklaratat e tij vinë pas negociatave të paqes në Berlin pjesë e të cilave ishte edhe Tusk mes vendeve tjera evropiane.
Në një deklaratë të lëshuar të hënën, udhëheqësit evropianë thanë se kishin rënë dakord të punonin së bashku me SHBA-në dhe Ukrainën “për të arritur një paqe të qëndrueshme që ruan sovranitetin ukrainas dhe sigurinë evropiane”, duke vënë në dukje “konvergjencë të fortë midis Shteteve të Bashkuara, Ukrainës dhe Evropës”.
“Një Ukrainë e kërcënuar me një agresion të ri përbën një rrezik të madh për Poloninë dhe ato vende pranë frontit”, tha gjithashtu Tusk, duke kërkuar garanci sigurie, citon Anadolu.
Tusk përsëriti gjithashtu se trupat polake nuk do të merrnin pjesë në asnjë mision të mundshëm paqeruajtës në Ukrainë, duke theksuar se Polonia do të mbështeste në vend të kësaj Koalicionin e të Gatshmëve me mjete të tjera.
Tusk ka përmendur se nuk do t’i bëj presion Ukrainës që të bëj lëshime, dhe se çdo vendim duhet të bëhet sipas kalkulimeve të vet shtetit ukrainas.
