Kryeministri i Norvegjisë, Jonas Gahr Store, deklaroi të hënën se sulmi i Shteteve të Bashkuara ndaj centraleve bërthamore iraniane përbën një shkelje të ligjit ndërkombëtar.
Në një intervistë për agjencinë norvegjeze të lajmeve NTB, Gahr Store tha: “Kryerja e një sulmi të tillë nuk është në përputhje me të drejtën ndërkombëtare.
” Ai theksoi se kjo ndërhyrje ka ndërlikuar më tej situatën në Lindjen e Mesme dhe ka lënë Këshillin e Sigurimit të OKB-së praktikisht të paaftë për të vepruar.
Kryeministri norvegjez u shpreh i shqetësuar për përshkallëzimin e konfliktit, duke vënë në dukje se përpjekjet për një zgjidhje diplomatike dhe për një marrëveshje të re bërthamore me Iranin nuk kanë shënuar përparim, shkruan Anadoly.
“Është për të ardhur keq që puna për një marrëveshje të re bërthamore nuk ka avancuar,” tha ai.
Ai shtroi gjithashtu pyetjen nëse sulmi amerikan mund të justifikohej si një akt vetëmbrojtjeje.
“E drejta ndërkombëtare njeh të drejtën për vetëmbrojtje, por është e diskutueshme nëse ky rast hyn në atë kategori për Shtetet e Bashkuara,” shtoi Gahr Store.
“Ky konflikt nuk ka zgjidhje ushtarake. Të gjitha palët, përfshirë SHBA-të, duhet të respektojnë ligjin ndërkombëtar. Sulmi i fundit nuk e zëvendëson nevojën për një marrëveshje afatgjatë dhe të qëndrueshme, sado e vështirë të jetë ajo tani,” përfundoi ai.
Të dielën, Presidenti amerikan Donald Trump njoftoi se forcat amerikane kishin kryer sulme ajrore ndaj centraleve bërthamore iraniane në Fordo, Natanz dhe Isfahan.
