Kryeministri i Republikës së Irlandës, Leo Varadkar, vizitoi sot Misionin e Bashkimit Evropian për Sundim të Ligjit në Kosovë (EULEX).
“Në kompleksin e Misionit për mbështetje në Fushë Kosovë, Varadkar u mirëprit nga Shefi i Misionit EULEX, Giovanni Pietro Barbano, ku edhe inspektoi një gardë të nderit e përbërë prej pjesëtarëve të Njësisë Policore të Specializuar të EULEX-it dhe të Njësive Policore të Specializuara Rezervë”, thuhet në njoftimin për medie.
Shefi i EULEX-it Barbano e falënderoi për mbështetjen e fuqishme që i ka dhënë Irlanda misionit.
“Ishte nderë që prita në vizitë Taoiseach Varadkar në EULEX dhe që pata rastin për të falënderuar Irlandën për mbështetjen e fuqishme dhe të gjatë dhënë Misionit, si përmes shërbimit të përkushtuar të pjesëtarëve irlandezë të stafit, që përfshinë edhe në pozita të larta,” tha Barbano.
Po ashtu njoftimi thotë se Varadkar bashkëbisedoi me Barbano për situatën aktuale të sigurisë në Kosovë.
Theksojmë që Leo Varadkar është kryeministri i parë irlandez që ka vizituar vendin tonë. Ai ka ardhur të enjten dhe është pritur me ceremoni shtetërore nga kryeministri, Albin Kurti. /teve1.info/