Kryeministri i Irakut, Mohammed Shia al-Sudani, ka propozuar një përgjigje kolektive ndaj sulmeve ndaj çdo vendi arab apo islamik, në të cilën një sulm ndaj njërit konsiderohet si agresion ndaj të gjithëve.
Duke folur në samitin emergjent arabo-islamik në Doha, al-Sudani tha: “Siguria dhe stabiliteti i çdo vendi arab apo islamik janë pjesë integrale e sigurisë sonë kolektive.”
Duke shtuar se “kushtet aktuale kërkojnë kalimin nga dënimi drejt veprimit të koordinuar kolektiv”, ai propozoi formimin e “një komiteti të përbashkët arabo-islamik për të përcjellë qëndrimin tonë në Këshillin e Sigurimit dhe Asamblenë e Përgjithshme të OKB-së, Bashkimin Evropian dhe forume të tjera ndërkombëtare”.
“Kemi një mundësi reale për të dërguar një mesazh të qartë që konfirmon se siguria e vendeve tona nuk është çështje për negociata,” tha ai, citon Al Jazeera.
Ai u bëri thirrje liderëve në samit që të miratojnë “një qëndrim të unifikuar arab dhe islamik që dënon sulmin” ndaj Katarit, të cilin ai e cilësoi si “tejkalim të çdo kufiri dhe shkelje të çdo parimi humanitar”, dhe të hartojnë një plan të gjithanshëm për armëpushim.
Dështimi për ta frenuar Izraelin, shtoi ai, “do të çojë në destabilizim të mëtejshëm dhe nuk do të sjellë siguri për asnjë palë”.
